नवीन लेखन...

दिल की गिरह खोल दो, चूप ना बैठो !!

“खामोशी ” शब्दांच्या पलीकडला – वहिदा, राजेश, धर्मेंद्र, गुलज़ार, ललिता पवार, देवेन वर्मा आणि हेमंतदा या साऱ्यांचा परिसस्पर्श मिरवणारा ! आज ५० वर्षांचा झालाय पण आपल्या रुग्णाच्या प्रेमात (एकदा नव्हे दोनदा) पडून त्याला बरं करण्याच्या नादात व्यक्तिगत आणि व्यावसायिक जीवनातील रेषा विसरणारी नर्स वहिदा आजही स्मृतीत लखलखीत आहे. ” हमने देखी हैं ,उन आँखोंकी महकती खुशबू ” (लता) , ” तुम पुकार लो, तुम्हारा इंतजार हैं ” ( हेमंत कुमार) आणि भूत /वर्तमान/आणि भविष्याची अद्भुत मिसळण करणारे ” वो शाम कुछ अजीब थी ” वाला किशोर , संगीत दस्तुरखुद्द हेमंत कुमारचं अशी सांगीतिक मेजवानी ! संपूर्ण काळी -पांढरी पार्श्वभूमी ( गडद भावनाविष्काराला पोषक नव्हे आवश्यक) आणि अभिनयाचे इमले उठवणारे वहिदा /राजेश !!

” प्यासा ” आणि ” खामोशी ” या दोनच चित्रफिती काळ्या -पांढऱ्या रंगांमुळे मनावर कोरल्या गेल्या आहेत.
“प्रायोगिक “उपचार पद्धतीचा वापर करून वेडेपणाच्या सीमेवर असलेल्या रुग्णाला विश्वास,आस्था, आणि प्रेम देता देता स्वतःच थकलेली परिचारिका त्याला औदासीन्यातून, निराशेतून बाहेर काढते मात्र स्वतःच ” खामोशी ” स्वीकारते. रुग्णात “परकाया “प्रवेश वगैरे संकल्पना ठीक आहे पण भावनांचे हेलकावे सोसताही यायला हवेत. रुग्णसेवा करता करता स्वतःचे खरे भावविश्व विसरणे /नाकारणे याचा असह्य ताण एकदा अनुभवूनही ती दुसऱ्या प्रयोगाला सामोरी जाते आणि तुटून पडते. दोन्हीवेळा तिला व्यक्त होताच येत नाही.

वैद्यकीय विश्वाचा हा आरसा विलक्षण आहे- विशेषतः गुंतवणूक असेल तर !

कितीवेळा पाहिला /ऐकला ” खामोशी ” तरी अतृप्ती संपत नाही. काळाच्या पडद्यावरची ही अभिजात कलाकृती आहे.

२००५ साली ” क्योंकी —– ” हा सलमान, जॅकी ,करीना ,ओम पुरीचा चित्रपट आला- समांतर कथानक ( परिचारिकेऐवजी महिला डॉक्टर उपचार करणारी ). मात्र वेड्यांचे इस्पितळ, शॉक ट्रीटमेंट सारं काही तसंच ! स्वतःच्या चुकीमुळे प्रेयसी गमावलेला सलमान इथे शुश्रूषेसाठी भरती झालाय आणि महिला डॉक्टर त्याच्यात गुंतते. प्रियदर्शन च्या चित्रपटाला हिमेश रेशमियाचं संगीत ! चवीला असरानी ,रिमी सेन , मोहन जोशी आणि अतुल परचुरे सारखे दिग्गज ! मात्र शब्दशः वेडाचारात हा सिनेमा माती खातो. कोठेही अलवार नाजुकपण नाही, भावनांची गुंतागुंत नाही. सगळं बटबटीत , वरवरचं ! अपवाद फक्त ” क्योंकी इतना प्यार तुमको ” या अलका आणि उदीतच्या श्राव्य गीताचा. त्याबाबत या टीमचे मनःपूर्वक अभिनंदन, पण बाकी आनंदी आनंद !!

अशी काळी -पांढरी तुलना योग्य नाही हे मान्य ! कथानक एकसारखे असल्याने साहजिकच दोन्ही चित्रकृती जवळाजवळ ठेवून पाहण्याचा मोह झाला. ही स्पर्धा नाही, कारण अस्सलाच्या आसपास जाणं अवघडच .

म्हणून टाळत होतो, पण आज लता-मन्नादांनी आग्रह केला – ” दिल की गिरह खोल दो ! ”

— डॉ. नितीन हनुमंत देशपांडे

डॉ. नितीन हनुमंत देशपांडे
About डॉ. नितीन हनुमंत देशपांडे 51 Articles
शिक्षणाने अभियंता, व्यवसायाने व्यवस्थापन सल्लागार, आवडीने लेखक ! माझी आजवर नऊ पुस्तके ( ६ मराठीत, २ इंग्रजीत आणि १ हिंदीत) प्रकाशित झालेली आहेत. आणखी चार पुस्तकांवर काम सुरु आहे. सध्या दोन मराठी वृत्तपत्रात साप्ताहिक सदर लेखन सुरु आहे. कथाकथन,काव्यवाचन, वक्तृत्व आणि वादविवाद स्पर्धांमध्ये राज्यपातळीवर सहभाग आणि पारितोषिके !

Be the first to comment

Leave a Reply

Your email address will not be published.


*


महासिटीज…..ओळख महाराष्ट्राची

रायगडमधली कलिंगडं

महाराष्ट्रात आणि विशेषतः कोकणामध्ये भात पिकाच्या कापणीनंतर जेथे हमखास पाण्याची ...

मलंगगड

ठाणे जिल्ह्यात कल्याण पासून 16 किलोमीटर अंतरावर असणारा श्री मलंग ...

टिटवाळ्याचा महागणपती

मुंबईतील सिद्धिविनायक अप्पा महाराष्ट्रातील अष्टविनायकांप्रमाणेच ठाणे जिल्ह्यातील येथील महागणपती ची ...

येऊर

मुंबई-ठाण्यासारख्या मोठ्या शहरालगत बोरीवली सेम एवढे मोठे जंगल हे जगातील ...

Loading…

error: या साईटवरील लेख कॉपी-पेस्ट करता येत नाहीत..