नवीन लेखन...

अलाकान

सदुसष्ट वर्षांपूर्वी चेन्नईमध्ये एका सावळ्या परंतु नाकशार मुलीचा जन्म झाला.. तिला पाहताक्षणीच नर्सच्या तोंडून ‘अय्यो, अलाकान!’ हे शब्द बाहेर पडले.. म्हणजेच हिंदीत ‘खुबसूरत!’

जेमिनी गणेशन व पुष्पवल्ली यांची ही सुपुत्री बारा वर्षांची असतानाच बालकलाकार म्हणून पहिल्यांदाच कॅमेऱ्यापुढे धीटपणे उभी राहिली.. ते आजपर्यंत तिचा ‘जलवा’ तसाच राहिला!!

तिला पहिला चित्रपट मिळाला, ‘सावन भादो’. नायक होता नव्यानेच आलेला नवीन निश्चल. चित्रपट तुफान गाजला. त्या पाठोपाठ तिचे एलान, हसीनों का देवता, गोरा और काला, एक बेचारा, रामपूर का लक्ष्मण हे चित्रपट आले व तिचे चित्रपटसृष्टीत बस्तान बसले..

आजपर्यंत १८० चित्रपट करणाऱ्या या रेखा नावाच्या ‘खुबसूरत’ अभिनेत्रीने काही अविस्मरणीय चित्रपटही दिले, ज्या चित्रपटांची निर्मिती जणू काही तिच्यासाठीच केलेली होती.. ‘खुबसूरत’ चित्रपटात तिने अल्लड तरुणीची, हलकीफुलकी भूमिका केली. ‘उत्सव’ मधील तिची वसंतसेना कुणीतरी विसरु शकेल का? ‘उमराव जान’ चित्रपटात तर तिने ‘जान’च ओतली आहे.. ‘मुकद्दर का सिकंदर’ चित्रपटातील जोहराबाईला, खुद्द लंबूही विसरला नाही, मग आपली काय पत्रास? ‘इजाजत’ मधील सुधा, ही रेल्वे स्टेशनवर नाही तर आपल्या हृदयात घर करुन रहाते.. ‘घर’ चित्रपटातील तिचा सशक्त अभिनय मनात ‘घर’ करुन राहतो.. ‘नमक हराम’ मधील कामगार वस्तीतील भोळी भाबडी श्यामा, राजेश खन्नाच्या नव्हे तर आपणच तिच्या प्रेमात पडतो..

तिने अनेक दाक्षिणात्य हिंदी चित्रपटात काम केलेले आहे, त्यामध्ये जितेंद्र सोबतच्या चित्रपटांची संख्या ही सर्वाधिक आहे. दोन भुवयांच्या मध्ये बिंदी लावण्याच्या तिच्या पद्धतीचे असंख्य स्त्रियांनी अनुकरण केलेले आहे..

तिचे नाव पहिल्यांदा विनोद मेहरा बरोबर जोडले गेले. नंतर अमिताभ बच्चन बरोबर ‘सिलसिला’ सुरु झाला.. अमिताभचे चित्रपट पाहताना, त्याच्यासोबत तिने समरसून केलेला अभिनय खूप काही सांगून जातो…

तिला कडक मंगळ असल्यामुळे ‘मंगळसूत्र’ चित्रपटात काम करुनही तिला विवाहसौख्य असे लाभलेच नाही. एकदा वय निघून गेल्यावर तिने लग्नाचा विषयच सोडून दिला आहे..

सर्वसाधारणपणे वयाच्या पन्नाशीनंतर अभिनेत्री मायानगरीच्या या झगमगाटापासून दूर जातात.. हिच्या बाबतीत नेमके उलटे घडलेले आहे, पन्नाशीनंतर हिचे सौंदर्य वाढतच गेलं व प्रत्येक वाढदिवसाला म्हातारपण, तिला चिरतारुण्याचा आशीर्वाद देऊन निघून जाऊ लागलं…

ती सदुसष्ट वर्षांची झालीय. अजूनही तीन तपं तरी ती सेलेब्रिटी म्हणून नक्कीच वावरेल याची खात्री आहे…

भूमिती विषयात, अनेक बिंदू मिळून रेखा (रेष) तयार होते.. हे वाचलेलं होतं.. तशीच ही अनेक भूमिका लिलया साकारणारी, सरळ रेखा अनंत काळ रसिकांच्या स्मरणात नक्कीच राहील…

— सुरेश नावडकर.

मोबाईल: ९७३००३४२८४

१०-१०-२१.

सुरेश नावडकर
About सुरेश नावडकर 158 Articles
माझा जन्म सातारा जिल्ह्यात झाला. नंतर पुण्यात आलो. चित्रकलेची आवड असल्यामुळे कमर्शियल आर्टिस्ट म्हणून कामाला सुरुवात केली. नाटक, चित्रपटांच्या जाहिराती, पोस्टर डिझाईन, पुस्तकांची मुखपृष्ठ, अशी गेली पस्तीस वर्षे कामं केली. या निमित्ताने नाट्य-चित्रपट क्षेत्रातील कलाकार, तंत्रज्ञांशी संपर्क झाला. भेटलेली माणसं वाचण्याच्या छंदामुळे ही माणसं लक्षात राहिली. कोरोनाच्या लाॅकडाऊनच्या काळात त्यांना, आठवणींना, कथांना शब्दरुप दिले. रोज एक लेख लिहिता लिहिता भरपूर लेखन झालं. मराठी विषय आवडीचा असल्यामुळे लेखनात आनंद मिळू लागला. वाचकांच्या प्रतिसादाने लेखन बहरत गेले.

Be the first to comment

Leave a Reply

Your email address will not be published.


*


महासिटीज…..ओळख महाराष्ट्राची

रायगडमधली कलिंगडं

महाराष्ट्रात आणि विशेषतः कोकणामध्ये भात पिकाच्या कापणीनंतर जेथे हमखास पाण्याची ...

मलंगगड

ठाणे जिल्ह्यात कल्याण पासून 16 किलोमीटर अंतरावर असणारा श्री मलंग ...

टिटवाळ्याचा महागणपती

मुंबईतील सिद्धिविनायक अप्पा महाराष्ट्रातील अष्टविनायकांप्रमाणेच ठाणे जिल्ह्यातील येथील महागणपती ची ...

येऊर

मुंबई-ठाण्यासारख्या मोठ्या शहरालगत बोरीवली सेम एवढे मोठे जंगल हे जगातील ...

Loading…

error: या साईटवरील लेख कॉपी-पेस्ट करता येत नाहीत..