नवीन लेखन...

फोटो

हौसेने अल्बमचा ढीग घेऊन मुला-नातवंडांसोबत;
हसत खिदळत एकेक करत बघितला जातो तो… फोटो!!

एकांतात आपल्या दिवंगत जोडीदाराच्या स्मृतींना उजाळा देताना; अनाहूतपणे पडणारा अश्रू झटकन पुसत उराशी धरला जातो तो… फोटो!!
निसर्गाच्या सानिध्यात त्याचं देखणं रूप डोळ्यात साठवण्याऐवजी;
घाईघाईने कॅमेरात कैद केला जातो तो…..फोटो!!

लग्न समारंभ शेवटच्या टप्यात आला असताना;
ज्यावरून नातेवाईकांमध्ये रुसवे फुगवे होतात तो…..फोटो!!

सुंदर पाककृती केल्यावर सगळ्यांना ताटकळत ठेवत;
सोशल मीडियावर टाकण्यासाठी काढला जातो तो…..फोटो!!

कठीण अश्या न समजणाऱ्या गोष्टी, अभ्यास;
झटकन सोपा करून उलगडून सांगणारा तो…..फोटो!!

सीमेवर तैनात सैनिक आपल्या लहानग्यांचा पापा घेण्यासाठी;
रोज रात्री झोपताना हळूच पाकिटातून काढतो तो…..फोटो!!

आपल्या वीरमरण प्राप्त मुलाला अभिमानाने सलाम करणाऱ्या;
त्या माऊलीच्या हाती वर्तमानपत्राच्या कात्रणातला तो…..फोटो!!

वाढदिवसाच्या बॅनरवर शुभेच्छा देण्यासाठी;
शुभेच्छुकांची चढाओढ सुरू असते तो…..फोटो!!

सांस्कृतिक कार्यक्रमाच्या भरगच्च जाहिरातीत;
श्रेष्ठत्वाच्या मुद्यावरून मानापमान नाट्य रंगतं तो…..फोटो!!

आज कितीही स्मार्ट असलो तरी एकेकाळी बावळट होतो;
हे “सत्य” बिनदिक्कतपणे दाखवून देतो तो…..फोटो!!

आपण खरंच इतके वाईट दिसतो का? हा प्रश्न पडावा;
असा सरकारी कागदपत्रांवरचा तो…..फोटो!!

उपलब्ध असलेल्या “स्थळांचं” रूपांतर;
“कांदेपोहे” कार्यक्रमात होण्यासाठी महत्वाचा ठरतो तो…..फोटो!!

कधी स्वच्छ पाण्यासारखा…. अगदी नितळ;
तर कधी मृगजळासारखा फसवाही असतो तो…..फोटो!!

चुकीच्या पद्धतीने साऱ्या समाजासमोर आणून;
एखाद्या व्यक्तीचं आयुष्यच उध्वस्त होतं तो…..फोटो!!

आपल्याला रोज नव्याने प्रेरणा देणाऱ्या;
आदर्श व्यक्तीचा सतत नजरेसमोर असतो तो…..फोटो!!

वेगवेगळ्या कचेऱ्या-कार्यालयांच्या भिंतीवर;
औपचारिकता म्हणून वर्षानुवर्षे लावूनही दुर्लक्षित असतो तो…..फोटो!!

मोठे निर्णय घेण्याआधी देवघरात जाऊन;
आपसूकच श्रद्धेने नतमस्तक व्हायला होतं तो…..फोटो!!

चहुबाजूंनी असलेल्या स्पर्धेच्या या युगात;
ऊर्जा देऊन जाणारा एखाद्या विजयाचा तो…..फोटो!!

“प्रत्यक्षाहुन प्रतिमा उत्कट” असं प्रत्येक वेळेस म्हणत;
पुन्हा पुन्हा काढला जातो तो…..फोटो!!

ट्रेंडच्या नावाखाली चित्रविचित्र तोंडं करून;
अगदी नाटकीपणे काढला जातो तो…..फोटो!!

आपल्या नकळत आपले खरेखुरे हावभाव टिपणारा;
candid चं लेबल लावलेला असतो तो…..फोटो!!

आपल्या आवाक्याबाहेरची पर्यटन स्थळं, सेलेब्रिटी, ग्रह-तारे;
यांना जवळून बघण्याचं आभासी समाधान देतो तो…..फोटो!!

४ x ६ चा कागदी तुकडा नुसता बघून;
डोळ्यासमोर सगळा 70 mm चा चित्रपट सुरू होतो तो…..फोटो!!

एकमेकांची मनं जोडत;
प्रत्येकाला गुंफून ठेवणारा दुवा असतो तो…..फोटो!!

नेहमी आठवणीत रमवता रमवता;
अचानक भानावर आणणाराही असतो तो…..फोटो!!

आपले आवडते-नावडते, आनंदाचे-दुःखाचे सारे “ठिपके” जोडत जोडत;
आपल्या आयुष्याची “रांगोळी” हळुहळु पूर्ण करत नेणारा तो…..फोटो!!

4विविधरंगी आठवणींचा “कोलाज” तयार करत;
आपलं विस्कळीत आयुष्य एकसंध ठेवणारा असतो तो…..फोटो!!

विविधरंगी आठवणींचा “कोलाज” तयार करत;
आपलं विस्कळीत आयुष्य एकसंध ठेवणारा असतो तो…..फोटो!!

— क्षितिज दाते.

ठाणे.

Avatar
About क्षितिज दाते , ठाणे 56 Articles
केवळ एक हौस म्हणून लिखाण सुरू केलं . वेगवेगळ्या विषयांवर पण साध्या सोप्या भाषेत लेखन . आकाशवाणीवरील कार्यक्रमात काही लेखांचं प्रसारण झालं आहे .काही लेख/कथा पॉडकास्ट स्वरूपात देखील प्रसारित झाल्या आहेत . Snovel या वेबसाईट / App वर "सहज सुचलं म्हणून" या शीर्षकाखाली तुम्ही ते पॉडकास्ट ऐकू शकता.

Be the first to comment

Leave a Reply

Your email address will not be published.


*


महासिटीज…..ओळख महाराष्ट्राची

रायगडमधली कलिंगडं

महाराष्ट्रात आणि विशेषतः कोकणामध्ये भात पिकाच्या कापणीनंतर जेथे हमखास पाण्याची ...

मलंगगड

ठाणे जिल्ह्यात कल्याण पासून 16 किलोमीटर अंतरावर असणारा श्री मलंग ...

टिटवाळ्याचा महागणपती

मुंबईतील सिद्धिविनायक अप्पा महाराष्ट्रातील अष्टविनायकांप्रमाणेच ठाणे जिल्ह्यातील येथील महागणपती ची ...

येऊर

मुंबई-ठाण्यासारख्या मोठ्या शहरालगत बोरीवली सेम एवढे मोठे जंगल हे जगातील ...

Loading…

error: या साईटवरील लेख कॉपी-पेस्ट करता येत नाहीत..