Web
Analytics
नसलं तरी दाखवता आलं पाहिजे – Marathisrushti Articles

नसलं तरी दाखवता आलं पाहिजे

नसलं तरी दाखवता आलं पाहिजे
लेव्हलचं सेटींग करता आलं पाहिजे..!!

काल केस कापून आलो.
आश्चर्य वाटलं ना? डोक्यावर फारसे केस नसताना ते कसे काय कापले बुवा, असंच वाटलं असेल ना तुम्हाला?

गंम्मत म्हणजे मलाही याचंच आश्चर्य वाटलं. मी महिन्यातून पाच वेळा केस कापतो. एका वेळेस ८० रुपये लागतात. या हिशोबाने महिन्याचे झाले ४०० रुपये. भरघोस जावळ असणारांच्या हेयर श्टायलीलाही महिनाभराचे इतके पैसे लागत नसणार..! मला आश्चर्य वाटलं ते हेच..!!

कमी केस असणारांना डोक्यावरचं केस असलेलं क्षेत्रफळ, केस नसलेल्या क्षेत्रफळाच्या लेव्हलमधे ठेवलं तरंच ते टक्कल बऱ्यापैकी बरं दिसतं;अन्यथा ते प्रमाणाबाहेर वाढलेले केस आर. के. लक्ष्मणांच्या ‘काॅमन मॅन’च्या केसांसारखे टकलाच्या दोहो बाजुला पिंजारल्यासारखे विचित्र दिसतात. तसं दिसू नये म्हणून माझे महिना अर्धा हजार खर्ची पडतात..!

कमी केसांवरून एक लक्षात आलं, मुळातच जे कमी असतं, ते बऱ्यापैकी आहे असं दाखवण्यात आपला बराच वेळ खर्ची पडतो. पैसेही जातात. त्याची लेव्हल मेन्टेन करणं म्हंजे लय कटकटीचं काम. खुप खर्च तरी करावा लागतो किंवा मग मेहेनत तरी करावी लागते..!!

आता बघा ना, सफेद कमी आणि काळे जास्त धंदे करुन गबर झालेल्यांना प्रतिष्ठेची लेव्हल सांभाळण्यासाठी मोठमोठाल्या रकमा डोनेशन द्याव्या लागतात, कुठल्या कुठल्या फकीरांच्या देवस्थानांना सोन्या-हिऱ्यांनी मढलेली सिंहासन द्यावी लागतात. कारण काळ्या पैशाबरोबर कमी झालेल्या प्रतिष्ठेची लेव्हल करुन घ्यावी लागते, तरच तो पैसा शोभतो. गरीबांची घरं-दारं विस्कटून निवडून आलेल्या नेत्यांना गरीबांच्या कल्याणाच्या घोषणा द्याव्या लागतात. कारण गरीबांच्या शापाची लेव्हल गरीब कल्याणाच्या नाटकाने केली तरच नेतागिरीची पातळी भरुन निघाल्यासारखी वाटते. दहिहंडी, गणपती, नवरात्रासारखे सण धुमधडाक्यात, प्रचंड पैसा खर्च करुन करावे लागतात तरच मुळातच नसलेल्या भक्तीची लेव्हल आहे असा देखावा करता येतो..अशी कितीतरी उदाहरणं सांगता येतील..!

हे सर्व मला माझ्या केसांसारखं वाटतं. डोक्यावर शिल्लक असलेले केस लेव्हल करत, डोक्यावरच्या केस नसलेल्या जागेशी लेव्हल केले तरच ते चांगलं दिसतं. अर्थात केसांचं चांगलं दिसण आणि वरील उदाहरणांतील ते ते दिसणं हे फक्त दिसणंच असतं. प्रत्यक्षात ते नसतंच. मग ते केस असोत की प्रतिष्ठा असो की नेतागिरी असो की भक्ती असो.. केसांची टकलाशी लेव्हल करुन, मी काॅमन मॅन असूनही ‘काॅमन मॅन’सारखा दिसू नये यासाठी माझीही धडपड सुरु आहेच की..

पण जाऊ दे, प्रत्यक्ष नसलं तरी चालेल, पण लेव्हलची सेटींग करुन दाखवता मात्र आलं पाहिजे, हा सध्याच्या यशस्वी होण्याचा मूलमंत्र झाला आहे, त्याला कोण काय करणार..!!

-नितीन साळुंखे
9321811091

माझं कार्टून महाराष्ट्राचे ज्येष्ठ व्यंगचित्रकार व माझे घनिष्ठ मित्र श्री. प्रभाकर वाईरकर यांनी काढलं आहे..



नितीन अनंत साळुंखे  उर्फ गणेश
About नितीन अनंत साळुंखे  उर्फ गणेश 348 Articles
श्री नितीन साळुंखे (मित्रपरिवारात गणेश या नावाने परिचित) हे मुळचे सिंधुदुर्ग जिल्ह्यातील वैभववाडी तालुक्यातील खांबाळे या गावचे. सध्या मुक्काम मुंबईत. वाचन, लेखनाची अत्यंत आवड. स्वत:चा ७०० हून जास्त पुस्तकांचा संग्रह. इतिहास, भाषा,शब्दांचा जन्म, देव, धर्म, संस्कृती, प्रथा, परंपरा यांचा अर्थ काय व त्या कशा अस्तित्वात आल्या याचा शोध घेण्याची विशेष आवड. लहानपणापासून संघ स्वयंसेवक व संघविचारांशी एकनिष्ठ. पुणे येथील संघप्रणित सर्वात मोठ्या अशा जनता सहकारी बॅंकेतील प्रदिर्घ नोकरीनंतर त्यांचे मित्र आणि आमदार प्रमोद जठार यांच्याबरोबर काम करण्यासाठी त्यांनी २००७ मध्ये नोकरी सोडली. त्याचबरोबर मित्राबरोबर मुंबईत बांधकाम व्यवसायात पदार्पण. २०-२२ वर्षांचा ज्योतिष शास्त्राचा अभ्यास असल्यामुळे परिचितांमध्ये एक उत्तम ज्योतिषी म्हणून ओळख. सर्व थरातील मित्र. त्यातही बहुतकरून लेखक, कविंचा, कलाकारांचा जास्त भरणा.

Be the first to comment

Leave a Reply

Your email address will not be published.


*


महासिटीज…..ओळख महाराष्ट्राची

कोकणचा मेवा – टिकाऊ पदार्थ

ताज्या कोकणी मेव्याची चव अनुभवणे ही पर्वणीच असते. मात्र वर्षभर ...

कोकणचा मेवा – जामफळ

उन्हाळ्यातील उष्णता कमी करण्यासाठी निसर्गत: डोंगर उतारावर येणारे फळ म्हणजे ...

कोकणचा मेवा – फणस

प्रवासात सामानाचे वजन वाहून नेतांना कष्ट पडतात. पण कोकणातला फणस ...

कोकणचा मेवा – जांभूळ

कोल्हापूरकडे जातांना आंबा घाटाच्या परिसरात जांभळाची झाडे अधिक प्रमाणात आहेत ...

Loading…