नवीन लेखन...

मोहरली ही अवनी

ग्रीष्माच्या काहिलीने
आसमंत तप्त झाला
अति उष्णतेने धारित्रीस
कासावीस करून गेला ।। 1 ।।
भेगाळलेल्या जमिनी आणि
बंद पडलेली मोट
नाही आला पाऊस
तर कसं भरेल पोट? ।। 2 ।।
प्रत्येक जण प्रतीक्षेत
कधी येईल पाऊस
डोळ्यांतून पाणी येईपर्यंत
नको वाट बघायला लावूस ।। 3 ।।
पाण्याविना तडफडत होते
पशू, पक्षी, मानव
मग तो प्रासाद असो, इमारत असो,
शिवार असो वा अंगण ।। 4 ।।
गोठ्यात, जंगलात, चारा छावणीत
हंबरत होती गुरं ढोरं
निढळावर हात ठेवून बळीराजा
पावसाची करत होता आर्जवं ।। 5 ।।
इंद्राला रिझवण्यासाठी मोर
नाचत होते विसरून सारे भान
कोकीळ, पावश्या हाकारत होते
मेघांना, गाऊन सुंदर गान ।। 6 ।।
इंद्रदेवापर्यंत पोहोचल्या
लाखो मनांच्या आर्त हाका
वरुण राजाला धाडलं त्यानं
घेऊन ढगांच्या खूप साऱ्या लड्या।। 7 ।।
वाऱ्याला सोबत घेवून ढगांचे पुंजके
बागडू लागले आभाळभर
कुठं दाट कुठं विरळ
सैरावैरा धावाधाव माळरानावर ।। 8 ।।
विद्युल्लता पण सामील झाली
खेळायला पाठ शिवणीचा डाव
मग त्यांच्याही आनंदाला
राहिला नाही ठाव ।। 9 ।।
ढगुल्यांचा आणि विजुडीचा
खेळ आला रंगात
डफ-मृदंगाची जुगलबंदी
जमली जणू नभांगणात ।। 10 ।।
तहानलेली धरित्री आणि
तिची सारी लेकरं
पाहु लागली आभाळाकडे
विस्फारून त्यांची नेत्रं ।। 11 ।।
ढग कुजबुजले एकमेकांशी
हिरवे डोंगर अन् झाडे
दिसतील आपल्याला जिथं जिथं
बरसुया आपण फक्त तिथं तिथं ।। 12 ।।
बाकीच्या ओसाड प्रदेशाचं काय?
तिथंही चालू आहे आत्महत्यांचे सत्र
पाण्याविना
ते पण झालेत गलितगात्र ।। 13 ।।
चूक तर माणसांचीच आहे
वागावे लागेल सक्त
झाडे तोडून त्यांनीच तर केले
धरणीला या उजाड आणि रिक्त ।। 14 ।।
आता पावसाची मागणी करण्याचा
त्यांना राहिला नाही हक्क
त्यांच्याच पापाची शिक्षा मिळणार त्यांना
त्यासाठीच आहेत ते पात्र ।। 15 ।।
ढग झुकले थोडे खाली
झाले थोडे दक्ष
झाडांसाठी मानवांनी खोदलेल्या
खड्डयांकडे गेले त्यांचे लक्ष ।। 16 ।।
गावोगावी गावकऱ्यांनी
खोदले होते असंख्य चर
स्वच्छ करून ठेवल्या होत्या
कोरड्या विहिरी आणि हातपंप ।। 17 ।।
दारोदारी वाढवली होती
हजारो छोटी छोटी रोपं
मोठे विलक्षण आणि
आश्वासक होते ते दृश्य ।। 18 ।।
लहानथोरांची चालली होती लगबग
यावर्षी एकच होते सर्वांचे लक्ष्य
केला होता त्यांनी संकल्प
लावण्याचा कोटी कोटी वृक्ष ।। 19 ।।
हे पाहून आनंदाने मग
ढगांनी केली खूप दाटी
विजुताईच्या हातावर दिली
जोरदार टाळी ।। 20 ।।
आसमंतात वाजू लागला नगारा
सुटला भन्नाट वारा
होवू लागला ढगांचा गडगडाट
अन विजांचा लखलखाट ।। 21 ।।
बरसू लागल्या मग मेघांच्या
झिम्माड सरीवर सरी
थेंबांच्या टिपऱ्या वाजू लागल्या अंगणी
क्षणात पावसाने भिजली सारी धरित्री ।। 22 ।।
पावसाचा होताच धुवांधार वर्षाव
दरवळला तो मृदगंध आसमंतात
ओढे, नाले, नद्या, चर
आणि भरले सारे तलाव काठोकाठ ।। 23 ।।
कळून आली मानवाला
त्याची मोठ्ठी चूक
झाडे लावा झाडे जगवा
पाणी जिरवा, पाणी वाचवा
मंत्र अंगिकारला अचुक ।। 24 ।।
मोहरली ही अवनी
मग आनंदाने पानोपानी
सज्ज झाली नेसावयाला
हिरवी पैठणी……हिरवी पैठणी……।। 25 ।।
— मी सदाफुली
@ ✍️ संध्या प्रकाश बापट
सौ. संध्या प्रकाश बापट
About सौ. संध्या प्रकाश बापट 50 Articles
नमस्कार वाचकहो, मी, सौ. संध्या प्रकाश बापट (माहेरची पद्मश्री विष्णू फाटक), सातारा. मी, सातार्‍यातील विविध कंपन्यांमध्ये/ऑफिसमध्ये अनेक वर्षे विविध पदांवर काम केले. तसेच काही वर्षे स्वतःचा व्यवसायही केला. 2018 मध्ये मी, नोकरी आणि व्यवसायातून स्वेच्छा निवृत्ती घेतली. या सगळ्या वर्षांत, इच्छा असूनही मनासारखे लिहिण्यास वेळ उपलब्ध होत नव्हता. मला लहानपणापासून संगीत, नाटक, सिनेमा, अभिनय आाणि वाचन या सगळ्याची प्रचंड आवड आहे. मी हौशी नाटकांत, एकांकिका, पथनाट्य यांत अभिनय करत होते. युट्यूब वरील वेब सिरीजमध्ये अभिनय करत आहे. नुकतेच झी टीव्ही वरील 'लागीर झालं जी' आणि 'मिसेस मुख्यमंत्री' या मालिकेत मी भूमिका केल्या आहेत. मी लघुकथा, कविता, प्रासंगिक लेख, वेब सिरीजसाठी मराठी आणि हिंदीतून कथा-पटकथा लिहीत आहे. काही लघुकथा ई-दिवाळीअंकात प्रसिद्ध झाल्या आहेत. माझ्यातील सुप्तगुणांना प्रेरणा आणि वाव देण्यामध्ये फेसबुक आणि व्हाटस्अ‍ॅप या सोशल मिडीयाचा आणि मला कायम प्रोत्साहन देण्यार्‍या तुम्हा सर्व वाचकांचा फार मोठा वाटा आहे.
Contact: Facebook

Be the first to comment

Leave a Reply

Your email address will not be published.


*


महासिटीज…..ओळख महाराष्ट्राची

रायगडमधली कलिंगडं

महाराष्ट्रात आणि विशेषतः कोकणामध्ये भात पिकाच्या कापणीनंतर जेथे हमखास पाण्याची ...

मलंगगड

ठाणे जिल्ह्यात कल्याण पासून 16 किलोमीटर अंतरावर असणारा श्री मलंग ...

टिटवाळ्याचा महागणपती

मुंबईतील सिद्धिविनायक अप्पा महाराष्ट्रातील अष्टविनायकांप्रमाणेच ठाणे जिल्ह्यातील येथील महागणपती ची ...

येऊर

मुंबई-ठाण्यासारख्या मोठ्या शहरालगत बोरीवली सेम एवढे मोठे जंगल हे जगातील ...

Loading…

error: या साईटवरील लेख कॉपी-पेस्ट करता येत नाहीत..