वेसवार

मेतकुटाप्रमाणेच सुक्या प्रकारचं हे तोंडी लावणं. कोकणात- त्यातही राजापूरच्या बाजूला हे आवर्जून केलं जातं. मऊ भाताबरोबर चवीसाठी हे घेतलं जातं. याशिवाय फणसाची भाजी, गवारी, भोपळ्याच्या भाजीत तसेच उसळीत चव वाढवण्यासाठी घातला जातो.

साहित्य : पाव किलो तांदूळ, १०-१२ सुक्या लाल मिरच्या (तिखटाच्या आवडीनुसार मिरच्यांचं प्रमाण कमी-जास्त करावं.) एक वाटी अख्खे काळे उडीद, १ हळकुंड किंवा दोन चमचे हळद, धणे अर्धी वाटी, एक चमचा मेथी दाणे.

कृती : पातेल्यात तांदूळ सुकेच भाजायला घ्यायचे. तांदूळ अर्धे भाजत आले की मिरच्या घालायच्या. मिरच्या तांदळाबरोबर भाजल्या जायला हव्यात. तांदूळ काळे होईपर्यंत भाजायचे. काळे उडीद, धणे, मेथी वेगवेगळे भाजायचे. हळकुंडही भाजून घ्यायचं. हळद पावडर असेल तर जराशी कोमट करून घ्यायची. सगळं मिक्स करून मिक्सरमध्ये दळायचं.