संवाद

संवाद – दि. ८ ऑक्टोबर २०१९ (विजयादशमी अर्थात दसरा)

मित्रांनो,

`मराठीसृष्टी’च्या सर्व वाचक आणि लेखकांना `विजयादशमी’च्या हार्दिक शुभेच्छा…

आजचा दिवस खरंच खास आहे. आपल्या `मराठीसृष्टी’चं हे २५ वं वर्ष. पंचविशीत आलेली `मराठीसृष्टी’ आपल्या पसंतीला उतरलेय याचा खास आनंद साजरा करताना आपले सगळ्यांचे आभार मानणे हे तर अत्यावश्यक आहे. आपल्या सर्वांच्या प्रेमामुळेच ही वाटचाल शक्य झाली.

आजचा दिवस आणखी एका कारणानेही खास आहे. बरोबर १८ वर्षांपूर्वी, २००१ साली आजच्याच दिवशी, म्हणजेच विजयादशमीला, `लोकसत्ता फॉन्टफ्रिडम’ या सॉफ्टवेअरचं अनावरण झालं आणि बघता बघता ते सॉफ्टवेअर इतकं प्रचंड लोकप्रिय झालं की आजमितीला जगातील किमान ४ लाखांहून जास्त संगणकांवर ते इन्स्टॉल झालंय. या सॉफ्टवेअरच्या यशात `लोकसत्ता’ या दैनिकाचा, इंडियन एक्सप्रेस वृत्तपत्रसमूहाचा, लोकसत्ताचे तत्कालिन संपादक श्री अरुण टिकेकर आणि लोकसत्ताचे तत्कालिन ब्रॅंड मॅनेजर श्री विजय कडू यांचा प्रचंड हातभार आहे.

कोणत्याही व्यक्ती, संस्था किंवा उपक्रमाच्या आयुष्यात काही महत्त्वाचे टप्पे असतात. १८ वर्षे, २५ वर्षे… हे दोन टप्पे तसेच महत्त्वाचे… केवळ त्यामुळेच आज याची आठवण येते.

खरंतर “लोकसत्ता फॉन्टफ्रिडम”च्या आधी हे सॉफ्टवेअर १९९५ पासून `फॉन्टफ्रिडम’ या नावाने बाजारात उपलब्ध होतं. त्यालाही छान प्रतिसाद होता. म्हणजे `फॉन्टफ्रिडम’च्या अगदी पहिल्या आवृत्तीचं हे २५ वं वर्ष आहे हासुद्धा एक महत्त्वाचा भाग.

मधल्या काळात `मराठीसृष्टी’  च्या माध्यमातून `फॉन्टफ्रिडम’ या सॉफ्टवेअरमध्ये बरेच बदल घडवले गेले. अनेक सुविधा निर्माण केल्या गेल्या… आणि हे सॉफ्टवेअर अजुनही लोकांच्या मनात राज्य करतच आहे. ओंकार जोशी यांच्या सहभागाने `गमभन’ हे युनिकोड सॉफ्टवेअरसुद्धा यामध्ये अंतर्भूत झाले. सतत काहितरी नवीन देण्याच्या ध्यासातून अनेक सुविधा मराठीसृष्टीवर उपलब्ध केल्या गेल्या. आणि आता या सर्व सुविधांना एका समान धाग्यामध्ये बांधून एक नवा मंच तमाम मराठी बांधवांसाठी खुला होत आहे.

आज, २०१९ च्या विजयादशमीच्या निमित्ताने `मराठीसृष्टी’ सादर करत आहे एक अत्याधुनिक सुविधांनी भरलेला `लेखन मंच’. मराठीतील संगणकीय लेखनासाठी जे जे काही आवश्यक असेल ते सगळं या एकाच मंचावर उपलब्ध झालंय.. मग ते साधं टायपिंग असू दे, की स्पेलचेकर, मजकूर नटवायचे विविध फॉन्ट असू दे की इतर काही… यादी बरीच मोठी आहे. सगळी इकडेच वाचण्यापेक्षा ती देणार्‍या खास पानावर ती जरुर वाचा.

`मराठीसृष्टी’ने आणखी एक मोठा प्रकल्प हातात घेतलाय.. तो म्हणजे “Mission1M”.

“1 M” म्हणजे “One Aim”…  म्हणजेच `एकच लक्ष’…

“1 M म्हणजे “One Million” म्हणजेच `एक दशलक्ष’….

या प्रकल्पांतर्गत आमचं ध्येय आहे मराठी भाषेत विविध विषयांवरील 1 Million म्हणजेच १ दशलक्ष पाने उपलब्ध करणे. यात अभ्यासपूर्ण लेखनाबरोबरच साहित्य, ज्ञान, मनोरंजन या सगळ्याच विषयांतील मजकूर उपलब्ध होईल.

आतापर्यंत `मराठीसृष्टी’ने कोणत्याही प्रकारचं सरकारी अनुदान न कधी मागितलेय, ना कधी सरकारने दिलंय….

हा प्रकल्प `मराठी माणसांचा, मराठी माणसांसाठी’ आहे. `मराठीसृष्टी’ हे सुसंवादाचं माध्यम आहे. हा संपूर्ण प्रकल्प कोणत्याही सरकारी अनुदानाशिवाय पूर्ण करायचा आहे. त्यामुळे हा प्रकल्प लोकसहभागातून उभा करायचा आहे. यासाठी  आपल्या सर्वांना या प्रकल्पात सहभागी होण्याचं आवाहन आहे. या प्रकल्पाची संपूर्ण माहिती www.mission1m.com या वेबसाईटवर उपलब्ध आहे…

आतापुरते एवढेच… पुन्हा भेटूया.. नियमित संवादासह !

 

 


यापूर्वीचे संवाद….


शतश: आभार………… आणि सुस्वागतम !!

मराठीसृष्टी आता नव्या रुपात आपल्या भेटीला आलेय. १९९६ मध्ये सुरु झालेला हा प्रवास आता एका मोठ्या, महत्त्वाच्या टप्प्यावर आलाय. वाचकसंख्या तर दिवसेंदिवस वाढते आहेच, पण नियमितपणे लेखन करणारेही मोठ्या संख्येने वाढतायत.

सामान्य नागरिकांपासून विविध विषयांतील तज्ज्ञांपर्यंत अनेकजण विविध विषयांवर इथे लिहितात. आपल्या सगळ्यांचे मनःपूर्वक आभार.

येणार्‍या काळात मराठीसृष्टीवर अनेक नव्या विषयांवर, नवनवे लेखक आपल्याशी संवाद साधणार आहेत. एक परिपूर्ण मराठी पोर्टल ही आपली ओळख आणखी ठसठसीत करण्यासाठी आपल्या सर्वांच्या सहकार्याची अपेक्षा तर आहेच.

कुठलीही वेबसाईट, पोर्टल किंवा एखादा ब्लॉग सुरु रहाण्यासाठी वाचकांची खरी गरज असते. मी असे बरेच ब्लॉग बघितले जे अतिशय चांगल्या विषयांना वाहिलेले होते. मात्र वाचकांच्या मर्यादित संख्येमुळे त्या ब्लॉगरचा उत्साह अवेळीच मावळून ते बंद पडले. अनेक चांगल्या वेबसाईटसचेही असेच झालेले दिसले.

तेव्हाच मराठीसृष्टीने निर्णय घेतला की हे पोर्टल व्यावसायिक दृष्टिकोनातूनच चालवायचे. व्यावसायिक याचा अर्थ केवळ धंदा पाहून असा नाही तर एकूणच professional attitude वापरुन पोर्टल चालवायचे. त्यासाठी उच्च दर्जाचे लिखाण, सोपी, सुलभ मराठी भाषा हे तर हवेच, पण विषयांमध्येही विविधता हवी. ओढूनताणून मराठी शब्द बनवून ते वापरण्यापेक्षा प्रसंगी रुळलेले इंग्रजी शब्द वापरणे आम्ही पसंत केले.

मराठीसृष्टीचे अनेक लेखक महाराष्ट्राबाहेर वास्तव्य करणारे आहेत. त्यामुळे व्याकरण आणि शुद्धलेखनाकडे लक्ष देतानाही त्याचा बाऊ किंवा अतिरेक केला नाही. शुद्ध – अशुद्ध ठरवणारे न्यायाधिश आपण कोण? “आनी-पानी” च्या भाषेची आम्ही टवाळकी केली नाही आणि विदर्भातल्या हिंदीमिश्रीत किंवा बडोदा-अमदाबादच्या गुजरातीमिश्रीत मराठीलाही तेवढंच महत्त्वाचं मानलं.

लेखकांना त्यांच्या लिखाणावर आलेल्या प्रतिक्रिया नियमितपणे मिळतील याची आम्ही काळजी घेतली.

विषयांतील वैविध्य हेही मराठीसृष्टीचे एक खास वैशिष्ट्य. पोर्टलवरील विविध वर्गवारींकडे बघतानाच त्याचा अंदाज यावा. आज अनेक ब्लॉग किंवा वेबसाईटसना त्यांच्या विषयांची लेबल लागलेली दिसतात. अमुक ब्लॉग खवैय्यांसाठी तर तमुक महिलांसाठी वगैरे वगैरे. मराठीसृष्टीने तसे होउ दिले नाही. मात्र वेगवेगळ्या विषयांवर लिहू इच्छिणार्‍या लेखकांसाठी काही खास व्यवस्था उभारण्यात पुढाकार घेतलाय. लवकरच त्याची माहिती आपल्याला मिळेल.

लवकरच मराठीसृष्टीच्या दैनंदिन वाचकसंख्येचा आकडा एक लाखावर जाईल. सामान्य मराठी माणसाच्या दैनंदीन जीवनातील घटना, त्याचे विचार, त्याची मते इतरांपर्यंत पोहोचवण्यात मराठीसृष्टीचा हातभार लागला याचा आनंद तर आहेच.

शेवटी पुन्हा एकदा मराठीसृष्टीच्या सर्व वाचकांचे आणि लेखकांचे मनःपूर्वक आभार!!!!