नवीन लेखन...

जाम’ची मजा

Homemade White Bread with Strawberry Jam

भाषा हा विषय फार मजेदार आहे. एकाच शब्दाचा अर्थ, तीन वेगवेगळ्या भाषेत कसा बदलत जातो ते पहा. त्याचंच एक उदाहरण बघूयात. शब्द आहे ‘जाम’.

मराठी भाषेत आपण सहज बोलून जातो… आज माझं डोकं ‘जाम’ दुखतंय.. असं सांगताना आपण वेदनेची सीमा ओलांडल्याचं, ‘जाम’ हे विशेषण लावून सांगतो..

हिंदी भाषेत तोच ‘जाम’ शब्द, एक ‘मादक पेय’ होऊन जातो.. ‘शाम’ झाल्यावर, काही जणांची ‘जाम’ घेण्याची वेळ होते..

इंग्रजी भाषेत, राष्ट्रीय महामार्गावर वाहनांची कोंडी होऊन जेव्हा वाहतूक पूर्णपणे ठप्प होते, तेव्हाच्या परिस्थितीला ट्रॅफिक ‘जाम’ झाली.. असं म्हटलं जातं.

मराठी भाषेतून ‘जाम’ हा शब्द आपल्याला विविध रूपांत भेटतो.. या शब्दाच्या आधी ‘गुलाब’ हा शब्द जोडला तर ‘गुलाबजाम’ म्हटल्यावर तोंडाला पाणी सुटते.. त्यातूनही ते चितळे बंधूंचे असतील तर विचारुच नका.. सुके असो वा पाकातले, ‘गुलाबजाम’ सर्वांनाच ‘जाम’ आवडतात..

सकाळच्या वेळी ब्रेकफास्टला लहान मुलांना ब्रेडच्या स्लाईसवर ‘जाम’ लावून दिला की, ते आवडीने खातात व ‘जाम’ खुश होतात..

पूर्वी एखाद्या कारखान्यातील कामगारांनी संप केला म्हणजे त्याला चक्का’जाम’ असं म्हटलं जायचं..

सणासुदीच्या दिवसांत मंडईत, लोकांची खरेदीसाठी ‘जाम’ गर्दी उसळते..

पावसात भिजून आल्यावर, डोक्यात पाणी मुरल्याने सटासट शिंका येऊ लागतात व सर्दीने आपण ‘जाम’ होऊन जातो..

प्रत्येक तरुणाला त्याच्या कॉलेजच्या दिवसांत एकतरी मुलगी ‘जाम’ आवडत असते. भले तो स्वतःच्या मनातील भावना तिच्यापुढे व्यक्त करु शकत नसेलही, मात्र मनातून त्याला ती ‘जाम’ आवडलेली असते. तिच्याशी दुसरं कोणी बोललं की, हा ‘जाम’ भडकतो. जसं काही तिच्यावर, याचाच हक्क असतो.. तिनं कधी याच्याकडे पाहून ‘स्माईल’ दिलं तर, हा ‘जाम’ खुश होतो. ती आठवडाभर कॉलेजमध्ये दिसली नाही तर हा ‘जाम’ वेडापिसा होतो. घरी आल्यावर बेचैन होऊन ‘जाम’ डोकं दुखायला लागल्याचं सांगून, बाम लावून शांत झोपी जातो. त्याची अवस्था दिवसेंदिवस ‘देवदास’ सारखी होते. डोक्यावर केसांचं टोपलं होतं. वडील त्याच्या हातावर पैसे ठेवून त्याला ह’जाम’कडे जायला सांगतात. कटिंग केल्यावर, तो नीटनेटका दिसू लागल्याने घरातले त्याच्यावर ‘जाम’ फिदा होतात. आता तो स्वतःच्या अभ्यासावर लक्ष केंद्रीत करुन, शिक्षण पूर्ण करतो. योग्य वेळी त्याचं, त्याच ‘जाम’ आवडलेल्या मुलीशी लग्न होतं व तो जीवनाची ‘मजा’ घेऊ लागतो.

माझ्या लिखाणात कुठे ‘जाम’ घोळ झाला असेल तर, मला सांभाळून घ्या आणि ‘मजा’में रहा.

© सुरेश नावडकर.

मोबाईल: ९७३००३४२८४

१४-७-२१.

सुरेश नावडकर
About सुरेश नावडकर 406 Articles
माझा जन्म सातारा जिल्ह्यात झाला. नंतर पुण्यात आलो. चित्रकलेची आवड असल्यामुळे कमर्शियल आर्टिस्ट म्हणून कामाला सुरुवात केली. नाटक, चित्रपटांच्या जाहिराती, पोस्टर डिझाईन, पुस्तकांची मुखपृष्ठ, अशी गेली पस्तीस वर्षे कामं केली. या निमित्ताने नाट्य-चित्रपट क्षेत्रातील कलाकार, तंत्रज्ञांशी संपर्क झाला. भेटलेली माणसं वाचण्याच्या छंदामुळे ही माणसं लक्षात राहिली. कोरोनाच्या लाॅकडाऊनच्या काळात त्यांना, आठवणींना, कथांना शब्दरुप दिले. रोज एक लेख लिहिता लिहिता भरपूर लेखन झालं. मराठी विषय आवडीचा असल्यामुळे लेखनात आनंद मिळू लागला. वाचकांच्या प्रतिसादाने लेखन बहरत गेले.

1 Comment on जाम’ची मजा

  1. नेहमीप्रमाणे नावडकर सरांचा “जॅम” चांगला व खुसखुशीत लेख

Leave a Reply to Dilip kulkarni Cancel reply

Your email address will not be published.


*


महासिटीज…..ओळख महाराष्ट्राची

रायगडमधली कलिंगडं

महाराष्ट्रात आणि विशेषतः कोकणामध्ये भात पिकाच्या कापणीनंतर जेथे हमखास पाण्याची ...

मलंगगड

ठाणे जिल्ह्यात कल्याण पासून 16 किलोमीटर अंतरावर असणारा श्री मलंग ...

टिटवाळ्याचा महागणपती

मुंबईतील सिद्धिविनायक अप्पा महाराष्ट्रातील अष्टविनायकांप्रमाणेच ठाणे जिल्ह्यातील येथील महागणपती ची ...

येऊर

मुंबई-ठाण्यासारख्या मोठ्या शहरालगत बोरीवली सेम एवढे मोठे जंगल हे जगातील ...

Loading…

error: या साईटवरील लेख कॉपी-पेस्ट करता येत नाहीत..